Lolo nga may ubang babaye sa motel namatay

CEBU, Philippines - Patay nang miabot sa tambalanan ang usa ka 60-anyos nga lalaki human kini gituohang giatake sa iyang sakit samtang kauban ang usa ka babaye diha sa usa ka motel sa barangay Pajo dakbayan sa Lapulapu sa milabay’ng gabii.

Ang namatay (pangalan gipugngan) residente sa sitio Humayhumay, barangay Gun-ob dakbayan sa Lapulapu.

Sa pasiunang imbestigasyon ni SPO1 Manolito Abellanosa nasayran nga mga alas 8:00 sa milabay’ng gabii kuyog sa namatay ang usa ka babaye nga gibanabanang 50-anyos ang pangidaron nga misulod sa maong motel.

Apan sa pagka alas-10 sa susamang gabii kalit nga nanawag ang kaubang babaye niini kay nangayo og tabang.

Si Alfred Villarobin nga maoy duty room boy maoy miresponde ug nakita ang 60-anyos nga lalaki diha sa sulod sa pansayan sa maong lawak nga wala na maglihok hinungdan nga ilaha kining gitabang ug gidala sa tambalanan apan gideklarar kining patay na.

Si Abellanosa nahibulong usab tungod kay kalit nga nahanaw ang maong babaye diha sa tambalanan una pa mangabot ang mga kabanay sa maong lalaki.

Walay nakitang foul play sa kapolisan sa kamatayon ni Napolis ug nagduda kini nga giatake sa iyang kasingkasing ang biktima hinungdan sa iyang kamatayon apan gi-rekomendar nilang ipa-awtopsiya kini aron pagtino sa hinungdan sa kamatayon niini. (BANATNEWS)