CEBU, Philippines - Gidakop sa kapulisan ang usa ka gipasanginlang tigpayuhot og ginadiling drugas kinsa gikatahong igsuon sa kagawad sa barangay Saac-Buaya, sa dakbayan sa Lapulapu.
Ang nadakpan sa Criminal Investigation and Detection Group (CIDG)-7 mao si Lito Casio, 37.
Ang operasyon natigayon atol sa hiniusang operasyon sa CIDG-7 ug kapulisan sa dakbayan sa Lapulapu inabagan sa Philippine Drug Enforcement Agency (PDEA), matud pang Chief Inspector German Mallari.
Si Mallari, hepe sa Criminal Investigation and Detective Team (CIDT) mihulagway kang Casio nga usa lang ka street pusher apan gika-report nga usa siya ka drug personality sa maong lugar.
Ang grupo ni Mallari armado og search warrant nga giisyu ni Regional Trial Court (RTC) Judge Marilyn Lagura-Yap nga maoy gibasehan sa pagronda kang Casio. Matud niya nga ilaha nang gipanid-an ang mga kalihokan ni Casio una nila gihimo ang operasyon.
Nakuhang ebidensya sa kapulisan ang upat ka medium ug tulo ka gagmay nga pakete ang sulod gidudahang shabu apan hugtanon kining gihimakak ni Casio ug mipasangil nga gisaka siya og kalit sa mga polis ug wala mopakita og warrant.
Atol sa operasyon adunay duha ka mga barangay tanod sa barangay nga mibarog isip mga saksi sa pagrekisa sa panimalay ni Casio.
Apan iyang giangkon nga sa miaging tuig nalambigit siya sa ilegal nga kalihokan apan karun mihunong na siya kay nagbag-o.
Si Casio anaa karun gibalhog sa detention cell sa CIDG-7 ug gipaabot nga pasakaan siya og kaso nga kalapasan sa Dangerous Drugs Act of 2002. (BANATNEWS)