Retiradong polis nailad sa gold bars

CEBU, Philippines - Usa ka retiradong police official ang nabiktima sa pagpangilad sa gold bar niadtong Miyerkules sa buntag sa usa ka hotel sa downtown area.

Usa sa upat ka suspetsado nadakpan hinuon ang mga awtoridad sa Theft and Robbery Section (TRS) sa Cebu City Police Office (CCPO) ug giilang si Josie Gil Jr. lumad nga taga Masbate.

Si retired Chief Inspector Mario Dela Peña Pepinas, lumad nga taga Baybay, Leyte nagpakitabang sa TRS human siya makabantay nga giilad siya sa tulo ka mga suspetsado nga iyang gikatransaksyon sa gold bar.

Ang duha ka kauban ni Gil pabilin pang gawasnon apan nailhan sa kapulisan nga sila si Armando Villegas, Riman Andronico ug Jerien Concepcion.

Ang biktimang si Pepinas nakabayad og P30,000 ngadto sa mga suspetsado isip pasiunang bayad sa gold bars nga nagkantidad og P8 milyones. Sa pasiunang imbestigasyon sa TRS midangop sa ilang buhatan niadtong Miyerkules sa buntag ang biktima. Giingong naabot sa Sugbu gikan sa Leyte ug mi-check-in sa usa ka hotel sa downtown area si Pepinas ug giduol ni Gil kinsa nagpailang gikan sa lalawigan sa Siquijor.

Ang suspek mikumbinsi ni Pepinas kun interesado kining mopalit og gold bars nga nagkantidad og P8 milyones ug gihangyo ang biktima nga mahimo kining mobayad og una og P30,000 isip downpayment aron lang makuha ang gold bars gikan sa Siqujor.

Ang biktima kinsa nagtuong walay binuang ang maong kasabot mibayad sa downpayment ug misaad nga iyang bayran ang kuwang kun ang gold bars madala na dinhi sa Sugbu.

Apan sa dili pa ma-deliver ang gold bars ang tulo ka mga kauban ni Gil nangayo’g laing dugang nga P50 mil ngadto sa biktima hinungdan nga nagduda na dayon si Pepinas ug midangop sa kapolisan.

Ang mga sakop sa miadto dayon sa hotel diin naghuwat ang mga suspek sa dugang nga P50,000 apan si Gil ray ilang naabtan ug gidakop.

Ang hepe sa TRS chief nga si Inspector Rolando Pinili miawhag sa publiko nga magbantay niining klaseha sa modus operandi aron dili sila mabiktima sa pagpangilad. (EIM)  (BANATNEWS)