Bata patay sa masaker

CEBU, Philippines - Gumikan sa away tungod sa iro, usa ka 9-anyos nga bata ang gipusil patay samtang nangaangol ang mga ginikanan niini human sila gimasaker sa ilang silingan samtang sila nangatulog sulod sa ilang balay niadtong Miyerkules sa gabii diha sa bukirang bahin sa barangay Guba siyudad sa Sugbu.

Ang namatay sulod sa Guba Emergency Hospital giilang si Jasper Ceniza, 9, usa ka grade 3 pupil sa Guba Elementary School human siya makaangkon og samad pinusilan sa iyang dughan.

Samtang samaran usab ang iyang mga ginikanan nga sila si Reynaldo Ybañez, 38, ug Cristina Ceniza, 27, nga mabdos.

Nadakpan hinuon dayon si Junrey Borres Andrecoso, 31, silingan sa mga biktima nga maoy gitumbok nga suspetsado sa krimen.

Ang suspek miangkon sa iyang nabuhat ug nagkanayon nga nasuko siya kang Reynaldo tungod sa bahad niini.

Sa wala pa mahitabo ang masaker, gikatahong mihulga si Reynaldo nga patyon ang binuhing iro ni Andrecoso tungod kay hapit niini mapaaki ang iyang anak nga si Jasper (ang namatay).

Matud ni Pagara gisugo ni Reynaldo si Jasper sa pagpalit og sigarilyo sa tindahan nga dili halayo sa ilang balay pipila na ka adlaw ang nakalabay apan mibalik sa agi ang bata tungod kay giingong gihambat siya sa iro sa suspek.

Tungod sa kalagot ni Reynaldo giingong mibahad kining iyang patyon ang iro kun napaakan pa ang iyang anak. Ang maong bahad miabot kang Andrecoso kinsa gihulagway sa mga silingan nga “potong” nga tawo.

Niadtong Miyerkules sa gabii armado og .45 nga kalibre gisulong sa suspek ang balay sa mga Ceniza ug gipaulanan og bala. Si Jasper maoy naantimano kay kini naigo sa dughan samtang sa paa ug batiis ra naigo ang mga ginikanan niini.

Ang magtiayon kasamtangang nagpaalim sa Cebu City Medical Center (CCMC).

Mitug-an sila sa kapulisan nga napugwat sila gikan sa pagkatulog dihang kalit mipakapaka ang lima ka buto sa armas, bisan samaron nakahigayon sa pagkamang pagawas si Reynaldo ug diha niya makit-i ang suspek nga mikaratel dayon ngadto sa kawayanan.

Ang mga polis nga miresponde midakop dayon sa suspek ug nakuhaan kini sa kalibre .45 nga gigamit sa maong krimen.

Sa interbyu sa mga tigbalita, si Andrecoso miangkon sa maong salaod apan miklarong wala gyuy labot unta ang bata sa iyang kasuko kay ang amahan lang niini maoy iyang tuyo.

Matud pa niya nga mao sad kini ang hinungdan nga mitahan dayon siya sa iyang kaugalingon ngadto sa kapolisan tungod kay nakonsensiya siya sa iyang nabuhat sa bata.

“Di unta siya padakop kun wa pa naigo ang bata,” matud pang Pagara kinsa midugang nga si Andrecoso pirmeng makasugo sa bata.

Gawas sa armas nga narekober sa posisyon ni Andrecoso, nakakuha usab ang kapulisan og upat ka kabhang, deformed slugs, ammunition, ug magazine.

Si Andrecoso kinsa anaa karun sa detention cell sa CCPO gipaabot nga pasakaan siya og tukmang kaso sa Cebu City prosecutor's office.(EIM) (BANATNEWS)