Koreano ug Filipina gipasaka'ag kaso

CEBU, Philippines - Ang National Bureau of Investigation (NBI) miduso na og kaso ngadto sa buhatan sa Provincial Prosecutors Office kagahapon batok sa usa ka Korean national ug usa ka babaye.

Ang suspetsado mao sila si Sung Tae Kim alyas Kim, hingkod ug molupyo sa Hilutungan Island Cordova ug Rose Brown alyas Ate Rose, molupyo sa Mar Beach sa Marigondon, syudad sa Lapulapu.

Samtang ang biktima mao ang usa ka 17-anyos nga taga barangay Basak syudad sa Lapulapu ug laing 21-anyos nga taga Marigondon sa maong dakbayan.

Sa giduso nga rekomendasyon ni NBI-7 Regional Director Edward Villarta, human sa ilang pag-imbistigar sa maong kaso, ilang nakita nga si Brown nakalapas sa kasong Republic Act 9208 nga mao ang Anti-Trafficking in Persons Act of 2003.

Samtang si Kim nakalapas usab sa susamang kaso ni Brown gawas niini nakalapas usab siya sa Republic Act 8353 kon anti-Rape Law of 1997, Republic Act 7610 kon Special Protection of Children Against Child Abuse, Exploitation and Discrimination Act .

Sa gipanumpaang pamahayag sa 17-anyos nga biktima, gisaysay niini nga ang iyang igsuong babaye nga nagpaabot sa iyang torno aron moduwa unta og madjong giduol sa usa ka Evelyn Omandak alyas ate Candy ug miingon nga adunay Rose Brown nga gustong makig-estorya kanila.

Human niini, miduol gilayon kanila si Ate Rose ug misaysay nga aduna siyay higalang Korean nga nangimbitar og mga babaye tungod kay ang igsuon niining lalaki molarga na ngadto sa Korea.

Matud pa sa dalagita nga si Ate Rose mibutyag ngadto kanila nga bayaran sila og tag P1,500 kun motambong sila sa party nga gidalit sa Koreano ug tagbuon sila sa ginganlan og Kuya Ivy.

Nahiabot sila sa maong lugar ug milibot sa maong beach uban ni Ate Rose ug pagkahuman og panihapon, nag-inom sila og Korean wine, ug dihang nahubog na siya iyang gihangyo si Kim nga mouli na siya

Apan gisultihan siya ni Kim nga makauli lang siya sakay sa pumpboat kun makighilawas kini kaniya.

Busa wala naman siyay mahimo, aron makauli misugot siya sa hangyo  ni Kim.

Apan human makighilawas ang biktima ngadto ni Kim wala siya niini palakta ug niana nang pagkabuntag.

Samtang sa reklamo sa 21-anyos kini misaysay nga siya ug ang iyang higala nahimamat ni Ate Rose sa ikaduhang semana niadtong buwan sa Oktobre ning tuiga diin gitanyagan sila niini nga bayran og P1,000 bugti sa ilang pagtambong sa usa ka party didto sa Hilutungan Island sa Cordova. Unya sa pag-abot nila sa maong lugar ang Koreano nga Kim kinsa maoy nagpahigayon og party mikuha og hulagway kanila ug gimandaran sila sa pagposing pag-ayo.

Nianang pagka-alas 11:00 pasado na sa gabii, gidala sila sa usa ka restaurant diin kalit nga gibunlot ni Kim ang 21-anyos ug gipahigda   sa usa ka lamesa ug didto sila naghilawas.

Samtang ang higala niini, giguyod usab paatubang sa kwarto ug didto gipakighilawasan usab ni Kim.

Human sa ilang pakighilawas ni Kim giitsa sa Koreano ngadto kanila ang P2 mil samtang ang mga tawo ni Kim nag-inom pa niadtong tungora.

Tungod sa ilang kahadlok, nangita sila og tawo nga makatultol kanila sa balay sa usa ka Walter nga maoy mohatod nila pabalik sa Marigondon apan nagdumili si Walter tungod sa bagyo.

Sa ilang pagkadesperado luyo sa kakusog sa ulan niadtong tungora nangita gayud sila og tawo nga makahatod kanila ngadto sa Marigondon diin mibayad sila niini og P300 .

Tungod sa gibuhiang pamahayag sa duha ka biktima ang NBI-7 nakakita og basehan aron iduso ngadto sa Prosecutors office ang nahisgutang kaso batok sa duha ka suspetsado. (BANAT NEWS)