Jail Guard sa CPDRC taktakonon
CEBU, Philippines - Ang buhatan ni Governor Gwendolyn Garcia mihatag og upat lamang ka adlaw’ng lugway sa jail officer sa Cebu Provincial Detention and Rehabilitation Center (CPDRC) aron pagsikop pagbalik sa pugante nga si Jojo Gañolon ug ang kapakyasan niini magkahulogan sa pagkataktak sa iyang trabaho.
Ang nagdumala sa CPDRC nga si Capitol Consultant on Security and Jail Matters, Ret. Col Cesar Veloso miingon nga ang upat ka adlaw nga tagal alang kang Jail Officer Roel Gil dili na mauswag pa.
Si Veloso miingon nga nagpadayon karon ang manhunt operation batok sa pugante ug gitahasan ni Veloso si Gil pagpakig-alayon sa mga sakop sa Provincial Intelligence Branch, kapolisan sa Argao ug Dalaguete kauban ang mga barangay tanod aron pagsikop kang Gañolon nga may kaso sa pagpayuhot og ginadiling drugas.
Una niini gikatahong mi-eskapo si Gañolon didto sa lungsod sa Argao atol sa paniudto human tangtangi sa iyang posas aron makakaon.
Si Colonel Veloso miingon nga kun mapakyas si Gil sa pagdakop kang Gañolon posibleng mataktak kini sa serbisyo sa gobyerno depende sa rekomendasyon sa officer on duty ug sa hukom ni Gobernador Gwen Garcia.
Base sa impormasyon nga nakuha ni Veloso ikatulong higayon na nga na-eskapohan si Gil og piniriso sulod sa 16 ka tuig niini nga pagserbisyo sa gobiyerno.(/WC)(BANAT NEWS)
- Latest
- Trending
