8-anyos nga miluwas sa igsuon gipasidunggan
CEBU, Philippines - Gihatagan og pasidungog sa National Risk Reduction Management Council ug sa Office of Civil Defense atol sa 2011 Gawad Kalasag national winners ang usa ka 8-anyos nga batang babayeng misalbar sa iyang usa pa ka tuig nga manghod gikan sa sunog sa ilang panimalay.
Gawas sa maong bata gipasidunggan usab isip Best Municipal Disaster Risk Reduction and Management Council sa 4th ug 6th class municipality ang lungsod sa Guimbal,Iloilo sa ikatulong higayon ug nasulod na karon sa 2012 Hall of Fame.
Ang gipasidunggang bata mao si Virginia Rojo nga taga Sipalay City, Negros Occidental kinsa manggiuwawong miatubang ug mitubag sa mga sakop sa media dihang kini giinterbyu.
Gihatag kaniya ang Heroic Act/Deed during Emergency Response and Rescue Operation.
Si Rojo 6-anyos palang dihang nahitabo ang sunog sa ilang balay. Sumala pa nga nakit-an niining nagdilaab na ang ilang balay apan misungasong kini ug gikuha ang iyang usa pa ka tuig nga manghod sa duyan ug gidala kini paggawas sa ilang balay niadtong Pebrero 2009.
Nasalbar niya ang iyang igsuon apan nakaangkon siya og second degree burn sa iyang liog ug nawong. Karon nagpuyo na siya sa iyang igsuon samtang 3-anyos na ang iyang manghod.
Si NDRRMC ug OCD executive director Undersecretary Benito Ramos nagkanayon nga ang aktibong partisipasyon sa gobiyerno ug pribadong sektor gikinahanglan aron mamenusan ang kadaot bunga sa mga kalamidad.
“Our overall is for nominal, if not zero casualty. During disasters there are circumstances that are beyond our control. But with the help of all sectors concerned, we can make it,” matud pa ni Ramos. (BANAT NEWS)
- Latest
- Trending
