Pinoy bitayon didto sa China

CEBU, Philippines - Lain na usab nga Filipino nga nakombikto didto sa nasud sa China tungod sa kasong drug trafficking ang gikatakdang bitayon karong Disyembre 8 human ang Chinese Supreme People's Court (SPC) sa Beijing mitugot sa desisyon sa kaso niini.

Sumala pa sa pamahayag sa Department of Foreign Affairs (DFA) sa website niini, ang maong Filipino kansang pangalan wala nila ibutyag nagpangidaron og 35-anyos, gikombikto human kini makuhai og 1.495 kilong heroin sa Guangxi, China nidtong Septiyembre 13, 2008.

Ang maong Filipino diha madakpi sa Guilin International Airport luwan sa usa ka abyon gikan sa nasud sa Malaysia sumala pa sa DFA.

Ang DFA nagkanayon nga gitahod sa Pilipinas ang desisyon sa korte sa maong nasud sanglit bisan dinhi higpit gyud ang kampanya batok sa ilegal nga drugas ug aduna kini kooperasyon sa ubang mga kanasuran lakip na niini sa nasud sa China aron pakgangon ang maong mga sindikato.

Ang mga kabanay sa maong Filipino gipahibalo na kabahin sa desisyon ug aduna nay gihimong pamaagi aron sa katapusang higayon makita pa nila ang maong kombiktado sa dili pa ipahamtang ang silot.

"The Philippine Government itself has a strong anti-illegal drug policy, and is closely cooperating with law enforcement agencies in China and in other countries on efforts against drug trafficking," sumala pa sa DFA.

Subling gipanawagan sa DFA ang mga Filipino ilabi na niadtong mga Overseas Filipino Workers (OFWs) nga dili magpabiktima sa sindikato sa ilegal nga drugas.

"Not to allow themselves to be victimized by international drug syndicates and to be extremely cautious when dealing with strangers in airports and other areas of transit," pahimangno pa sa DFA.

"We would like to stress that vigilance is the first major step in combating the modus operandi of international drug traffickers. We urge all our citizens to be on alert at all times in order not to be victimized by drug syndicates," dugang pa niini.

Mipasabot hinuon ang DFA nga gihimo sa gobiyerno ang tanang pamaagi aron hangyuon ang gobiyerno sa China nga paubsan ang silot gikan sa death penalty ngadto nalang sa life sentence. Kini naglangkob sa mga Filipino community didto, si Presidente Benigno Aquino III ingon man sa konsulada sa tanang paghusay sa maong kaso.

"The Philippine Government has made sustained and exhaustive representations and appeals with the Chinese Government at all levels to seek mitigated sentences for all Filipinos on death penalty," dugang pa sa DFA.

Samtang gikatakdang mobiyahe ngadto sa nasud sa China si Bise Presidente Jejomar Binay aron personal nga hangyuon ang China nga paubsan ang silot sa maong Filipino.(/EIM)(BANAT NEWS)