Dalagang nagbahig og shabu nadakpan

CEBU, Philippines - Usa ka 19-anyos nga babaye ang nabalhog sa karsel human kini gikatahong naaktohang nagbahig og shabu daplin sa dalan atol nga maghatud unta og warrant of arrest ang mga polis niadtong Martes sa buntag diha sa barangay Tanke, dakbayan sa Talisay.

Ang nasikop mao si Carol Dixie Bacalso, residente sa nahisgutang barangay mag-atubang sa kasong paghupot og ginadiling drugas human makuhai og usa ka plastic box, tulo ka gagmay’ng plastik nga pakete sa shabu ug laing unom ka mga gagmay’ng putos sa aluminum foil nga dunay sulod nga shabu ug kwarta nga mikabat tanan og P450.

Sa wala pa masikop si Bacalso, si SPO3 Frederick Larrobis, PO3 Arnold Damasco ug PO2 Roy Lofranco mianha sa barangay Tanke aron mag-serve og warrant of arrest sa usa ka tawo kinsa dunay kasong kalapasan sa Akta Republika 9165 kon “Comprehensive Dangerous Drugs Act Law” gikan sa sala ni Regional Trial Court (RTC) Judge Meinrado Paredes sa Branch 13 niadtong Oktubre 24, 2011.

Si Larrobis nga nahinabi sa Banat News kagahapon nagkanayon nga samtang naglakaw sila diha sa lugar nakita nila si Bacalso nga naglingkod sa daplin sa karsada nga dunay gibahig sa iyang kamot ug giihap.

Matud ni Larrobis wala makabantay si Bacalso nga nakapaduol na sila kaniya ug ilang nakita nga ginadiling drugas ang gibahig niini ug dihang ilahang gisita ang suspetsado nakugang nalang kini ug wala na makalihok pa. (BANAT NEWS)