2 nga nakalalis sa mga kapares naghikog

CEBU, Philippines - Duha na usab ka mga tawo ang nagkutlo sa ilang kinabuhi sa managlahing dapit dinhi sa Metro Cebu gumikan sa mga problema.

Sa sitio Tarcom Upper Laguerta sa barangay Lahug siyudad sa Sugbu usa ka Lee Mark Abella Pondar, 17, dunay kapuyo ug nanginabuhi isip drayber sa habal-habal   napalgang nagbitay sa iyang ig-agaw nga si Ronald Abella, 16.

Si Ronald mitug-an nila ni SPO4 Alex Dacua, PO3 Edario Manatad, PO2 Leory Baguio ug PO1 Esmer Escultor sa Homicide Section nga iyang naabtan sa payag si Lee Mark nga nagbitay ibabaw sa higdaanan niini.

Ang ilang mga ig-agaw nga sila si Junard Llamado ug Ramil Pondar nga dali niya gitawag mao nay nagtabang sa pagtangtang sa pisi diha sa liog niini apan patay na kini.

Matud sa mga ig-agaw nga sa sayo pa niana nag-away sa iyang kapuyo si Lee Mark. Sa laing nahitabong paghikog ginamit ang pisi nga gihigot sa liog, usa ka Emerson Bihag Paler, 36, ug guwardiya sulod sa Mactan Export Processing Zone (MEPZ) 1 sa barangay Pusok sa maong dakbayan ang napalgang patay sa panimalay niini diha sa Zone 5, barangay Buaya, dakbayan sa Lapulapu alas-2 pasado ang takna sa miaging kaadlawon.

Si PO2 Franklin Boloquia sa Homicide Section nga nahinabi sa Banat News miingon nga nadiskubrehan si Paler sa igsuon niini nga patay na nga nagtikungkong ang mga tiil ug may pisi sa liog nga ang pikas tumoy gihigot sa bungbong sa ilang panimalay.

Nasuta nga sa wala pa kini mapalging patay nagkalalis kini sa asawang si Marilou tungod sa pagsige niini og inom, human sa ilang lalis misulod na kini sa maong lawak nga nagtuo lang silang natulog.(/EIM)(BANAT NEWS)