Mogamit og lantaka silotan

CEBU, Philippines - Si Supt. Eddie Recamara, hepe sa Talisay City Police Station mibahad nga kutob sa mga tawong mogamit og lantaka ug ubang dagkong pabuto sa Pasko ug sa Bag-ong Tuig, ilang sikopon ug silotan.

Kini    aron malikayan ang dugoong panghitabo nga usahay mokutulo og kinabuhi sa mga hingtungdang mogamit sa mga peligrong pabuto.

Hinuon giawhag ni Recamara ang katawhan nga sa pagsaulog sa Pasko ug Bag-ong Tuig likayan unta nila ang paggamit og mga pabuto nga gidili sa balaod ilabi na sa mga lantaka aron paglikay sa disgrasya.

Base sa record sa kapolisan, sa milabay’ng mga tuig usa ka batang lalaki ang namatay sa barangay Tanke, sa maong dakbayan dihang nabuthan kini sa lantaka nga iyang giduwaan.

Si Recamara mibutyag sa Banat News kagahapon nga niining umaabot Pasko ug Bag-ong Tuig magpahigayon sila og higpit nga operasyon batok sa lantaka ug mga gidili nga pabuto.

Apan nanawagan siya sa publiko nga unta motabang usab sa kapolisan ug motuman sa balaod aron malikay sa disgrasya ug unta ang publiko mo-report sa ilang buhatan kung makakita sila og mga tawong mogamit og lantaka .

“Dili lang unta sila mogamit og mga devices for example mga lantaka tungod kay nakahatag kini og risgo sa kinabuhi sa katawhan…. Dili lang unta sila mogamit ana ug kining mga pabuto nga gidili sa balaod,” ni Recamara pa.

May mga motorista usab kaniadto nga nadisgrasya tungod sa lantaka nga gipabuto sa daplin sa karsada paghadlok sa mga magsakay og motorsiklo. (BANAT NEWS)