Tag-iya sa multicab nabalakang patyon

CEBU, Philippines - Nabalaka karon sa iyang kinabuhi ang tag-iya sa multicab nga gi-carnap niadtong Nobiyembre 22 sa barangay Tabunok siyudad sa Talisay karong may mga wala hiilhing tawo nga nagbahis-bahis sa ilang pinuy-anan.

Si Felix Enopia nga nahinabi sa Banat News mitug-an nga niadtong Sabado sa gabii nakadawat siya og tawag sa telepono gikan sa usa ka wala magpailang caller nga mihangyo kaniyang isibog ang kaso batok sa pito ka mga suspetsado nga naglakip sa usa ka polis nga sakop sa Regional Intelligence Division (RID)-7.

Hinuon lima ra sa pito ang nagkagulkol na karon sa prisohan human kini hidakpi sa kapolisan niadtong   Miyerkules sa hapon.

Ang maong caller mitanyag pa kang Enopia nga mohatag og P35 mil dungan sa paghangyo nga magkita silang duha apan ubos sa kondisyon nga dili na niya ipadayon ang pagpasaka og kaso batok sa mga suspek.

Matud ni Enopia nga mitug-an kaniya ang maong caller nga igo lang siya gisugo   sa utok sa maong carnapping.

Apan matud pa ni Enopia nga gibalibaran niya ang maong caller kay gusto niyang ipadayon gyud   ang pagsang-at og kaso batok sa mga suspetsado.

Niadtong Domingo sa buntag may   tulo ka mga lalaking wala hiilhi nga nagpunay og bahas-bahas sa palibot sa ilang balay ug nangita kaniya.

Gisundan kini sa pagka-udto ug pagkahapon sa maong adlaw ug ang mga silingan nga misuporta kaniya milimod ngadto sa maong mga tawo pinaagi sa pag-ingon nga wala sila makaila kaniya.

Didto na magsugod ang iyang kabalaka ug kahadlok sa iyang seguridad lakip na sa iyang pamilya.

Nagduda si Enopia nga ang tulo ka mga tawong nagpunay og balik-balik sa pagpangita kaniya sa ilang pinuy-anan may kalambigitan sa pagkawat sa iyang multicab.

Si Enopia miklaro nga wala na siyay interes nga iapil sa pagpasaka og kaso ang pulis kay mao kini ang mitabang aron madakpan ang lima sa unom ka suspetsadong mi-carnap sa iyang multicab sanglit gipakawalay sala niya ang maong pulis.

Si Supt. Eddie Recamara, hepe sa Talisay City Police Station mipasalig nga iyang himoan og imbestigasyon ang pasangil ni Enopia apan kinahanglan nga mosang-at kini og pormal nga reklamo sa iyang buhatan

Sa nasayran ang iyang multicab nga gi-parking niya atubangan sa ilang balay gi-carnap niadtong Martes sa kaadlawon apan iya kining   nakit-an didto sa sulod sa Camp Sotero Cabahug nga giilisan na og plate number.

Sa dihang gisusi sa Highway Patrol Group nga gipangulohan ni Chief Insp. Eduardo Mara, hepe sa Cebu Province ug Operation Officer sa HPG nasuta nga ang multicab ni Enopia , gi-deal sa usa ka pulis nga sakop sa RID ngadto ni Sr. Supt. Jose Antonio Rodrigo, hepe sa PNP Crime Laboratory. (BANAT NEWS)