Karambola sa sakyanan sa Mandaue daghan naangol

CEBU, Philippines - Pito ka tawo ang nangaangol dihang pito ka mga sakyanan ang nagbinanggaay human daroha sa 10-wheeler truck kagahapon sa hapon diha sa eskina Canduman ug Cebu North Road, Jagobiao, dakbayan sa Mandaue.

Sa pito ka mga sakyanan duha niini ang multicab nga pasaheroan nga dunay mga pasahero gikan sa lungsod sa Consolacion, duha ka pribadong multicab, usa ka Isuzu Elf truck nga dunay kargang mga motorsiklo ug duha ka pribadong awto.

Ang 10-wheeler truck nga gimaneho ni Victorino Bitoon gipanag-iya kini sa Yuson Construction and Supply sa lungsod sa Lilo-an maoy unang mibangga sa multicab dayon midaro ngadto sa laing multicab ug ang multicab midaro usab kini ngadto sa laing mga sakyanan. 

Si Bitoon kinsa natingkagol sa Station 3 sa dakbayan sa Mandaue gituohang moikyas tungod kay didto na kini mihunong sa Basak, Mandaue City tunga sa kilometro ang gilay-on gikan sa lugar nga nahitaboan.

Apan ang maong pasangil gihimakak sa maong driver ug nagkanayon nga naputlan siya sa preno diha pa lang sa North Road sa Jagobiao ug gipaningkamutan niyang mamaniobra ang iyang gimanehong sakyanan aron makalikay sa disgrasya.

Base sa report sa TV Patrol Central Visayas nga duha sa mga biktima mao ang manag-inahang Ludilyn Sotto, 32,ug ang iyang tulo ka tuig nga anak nga si Lara Jane Sotto kinsa gidala sa Mandaue District Hospital.

Dunay report nga adunay abogadong nakalas sa maong aksidente apan wala kini kompirmaha sa kapolisan. Sa oras pagsuwat niining balita ang kapolisan padayon pa sa ilang pagpahigayon og imbestigasyon sa aksidente. (EIM)(BANAT NEWS)