CEBU, Philippines - Nadayonan sa pagkamatay ang usa ka tawo kinsa gituohang giatake sa sakit samtang namasol sa daplin sa baybayon sa sitio Hesuya sa barangay Mactan, dakbayan sa Lapulapu sa miaging hapon.
Si PO2 Carlos Barluado sa homicide section sa kapolisan sa maong dakbayan mihulagway nga ang biktima ilang gibanabana nga anaa na sa 40 ngadto sa 50 anyos ang panuigon, nagsul-ob og purol nga may pamarog nga 5’3” ug pangag ang ibabaw nga bahin sa iyang ngipon.
Usa sa mga nakasaksi niini nga si Reymond Dehayco ug pipila ka mga kaubang mananagat nagkanayon nga silay mitabang dayon sa biktima human nila makita nga natumba kini sa baybayon.
Mitawag dayon sila og ambulansya ug pag-abot sa tambalanan ang mga doktor na maoy mimatuod nga patay na ang biktima.
Subay sa mga estorya sa mga nakasaksi nga nakita nila ang biktima nga naglakaw sa baybayon nga nagbitbit sa iyang pasol apan kalit lang kining natumba.
Sa sayo pa gituohan nilang nakuyapan lang kini kay giatake sa altapresyon o sakit sa kasingkasing.
Si PO2 Barluado miingon nga ang maong patay’ng lawas kasamtangang gipahiluna sa Surelife Funeral Homes sa maong dakbayan ug gipaabot ang mga tagtungod nga mosusi ug mo-ila sa maong patay’ng lawas. (BANATNEWS)