CEBU, Philippines - Usa ka piniriso sa Cebu Provincial Detention and Rehabilitation Center (CPDRC) nga nalambigit sa shootout sa kapolisan kaniadto nakaeskapo gikan sa mga kamot sa jail guards atol sa hearing sa kaso niini sa lungsod sa Argao.
Ang nakaeskapo mao si Jojo Gañolon, 27, nagpuyo sa barangay Balud ug lumad nga molupyo sa barangay Nalhug lungsod sa Dalaguete.
Sa pakighinabi sa Banat News ni PO2 Benjamin Gerozaga sa Argao Police, ang suspek gibantayan sa duha ka jail guard nga silang Roel Gil ug Roberto Creer.
Matud pa ni Gerozaga nga nangaon si Gañolon uban sa mga jail guards dihang kalit kining nahanaw ug wala na igkita sa mga gwardiya.
Ang kapolisan sa Argao uban sa jail guard mipahigayon na og hot pursuit operation inubanan usab sa hepe sa kapolisan sa lungsod sa Dalaguete nga si Insp. Dexter Basirio apan pakyas sila.
Sa pakighinabi usab sa Banat News ni SPO1 Veronico Centino, sa Dalaguete Police Station mibutyag nga ilaha nang giadto ang barangay Nalhug sa Dalaguete ug nagpadayon ang ilang pagpangita sa pugante.
Si Gañolon, mao ang igsuon sa namatay’ng si Joseph nga nakigpinusilay sa mga sakop sa Cebu Provincial Intelligence Branch ug Dalaguete Police niadtong Agosto 12 ning tuiga atol sa usa ka anti-illegal drug operations. (/EIM) (BANATNEWS)