2 Sunog miigo sa Cebu city

CEBU, Philippines - Gibanabanang mokabat sa P100 mil ang danyos sa sunog nga miugdaw sa tulo ka balay nga gihimong boarding houses diha sa Lapulapu Street, barangay Sto. Niño ning dakbayan sa Sugbu kagahapon sa dayon nang udto.

Si Senior Supt. Aderson Comar, Cebu City Fire Marshall mibutyag sa mga tigbalita nga napawong ang kalayo paglabay sa 7 minutos samtang wala pa masuta ang sinugdanan niini.

Usa ka Conching Batur, nga tag-iya sa usa ka kan-anan sa nahimutang sa maong dapit naangol sa tuong kamot.

Gidugang niya nga nagsugod ang kalayo sa second floor sa   boarding house sa kasikbit ra sab nga kan-anan ug boarding house nga gipanag-iya sa usa ka Christina Luardo ug midanyos usab sa tupad nga 6-storey Cebu Hang Ha Foundation Incorporated building.

Usa sa mga nasunogan nga si Lourdez Gacayan walay nasalbar nga butang lakip na mga dokumento ilabi na sa records sa iyang anak nga nagplanong mokuha og pasulit sa teachers board examination karung sunod tuig. Sa miaging gabii miulbo usab ang laing sunog sa San Roque sa barangay Mambaling ning siyudad nga nakontrolar sulod sa unom ka minutos.

Si FO1 Butch Labasbas mitug-an nga nagsugod ang sunog sa balay ni Hemelio Sabate samtang nakan-an usab ang TD Ting Warehouse ug midanyos og P75 mil, wala pa usab matino ang sinugdanan sa sunog. (BANATNEWS)