Napagan sa bugal-bugal sa kauban

CEBU, Philippines - Usa ka construction worker ang napagan ug maoy gidunggab sa mga batan-on sa miaging gabii diha sa eskina sa dalan Llorente ug Don Mariano Cui St. , sa barangay Capitol Site ning siyudad tungod sa pagbugal-bugal sa kauban niini og babaye.

Si Reynaldo Relatado, 30, steelman sa Yballe Construction ug stay-in sa construction site nga ilang gitrabahoan sa maong lugar gideklarar sa mga doktor nga dead on arrival sa Vicente Sotto Memorial Medical Center (VSMMC) human siya makaangkon og samad dinunggaban sa tuong dughan.

Sa pasiunang imbestigasyon nila ni PO3 Geoffrey Gutual ug PO2 Erwin Piquero ug mga kaubanan sa Homicide Section upat ka mga batan-ong lalaki nga nagsul-ob og jacket samtang nag sleeveless usab ang midunggab sa biktima.

Si Dionesio Orbita, 55, kauban sa biktima mitug-an sa kapulisan nga nakurat nalang sila nga kalit giduol ug gidunggab si Relatado sa maong mga batan-on.

Nakuha sa kapulisan sa crime scene ang kutsilyo nga may gitas-ong 4.5 ka pulgada nga wala nay puan nga maoy gigamit ug gibiyaan sa mga kriminal nga yanong nanglakaw paingon sa dalan B. Rodriguez sa barangay Sambag 2.

Si PO2 Geoffrey Gutual nga nahinabi sa Banat News nagkanayon nga subay sa iyang nakuhang impormasyon sa crime scene sa wala pa ang hitabo giingong nag-inom ang biktima uban sa iyang mga kaubang trabahante ug dunay mga babayeng nangagi ug daw gibugalbugalan sa kauban sa biktima pinaagi sa pag-ingon “hi’ puwede mangayo og number?”

Nagtuo si Gutual nga nagpalaban ang maong mga babaye kay wala magdugay miabot dayon ang kriminal ug gidunggab dayon ang biktima. (BANATNEWS)