Mikaon og itom nga uhong namatay

CEBU, Philippines - Usa ang patay samtang laing duha ang nalanag tungod sa pagkaon og itom nga uhong sa miaging adlaw sa barangay Guadalupe sa syudad sa Carcar.

 Ang namatay nailhan nga si Danilo Dayonot, 38, molupyo sa maong lugar samtang ang duha ka igsuon niini nga silang Aileen ug Renante nakasinati usab og pagsakit sa ulo apan maayo nalang kay natabang.

Sa report sa TV Patrol Central Visayas, nasayran gikan sa igsoun sa namatay nga si Aileen nga nakit-an sa namatay ang itom nga uhong diha sa bukirang bahin sa ilang barangay.

Giluto kini sa biktima nga gisagulan og sardinas apan human sila makakaon nabantayan nila ang biktima nga nagkaanam og kaluya ug milagom hangtud nga nakabsan sa kinabuhi.

Tungod niini silang nakakaon daling miadto sa Carcar City District Hospital diin sila nahatagan og pangontra sa hilo sa uhong.

Matud pa sa doktor sa maong tambalanan nga ang duha ka igsuon sa biktima nanggahi ang lawas ug naglabad ang ulo.

Pahimangno karun sa doktor nga dili magpataka og kaon og uhong kini ilabi na kung wala makaila sa klase niini.(EIM)  (BANATNEWS)