Nagwara-wara sa pinuti nasikop

CEBU, Philippines - Usa ka tawong nanghasi ug nagwara-wara sa iyang pinuti sulod sa KTV bar sa may Highway, barangay Basak, dakbayan sa Mandaue gisikop sa kapolisan sa miaging kaadlawon.

Ang gidakop ug nasakmitan og pinuti mao si Nelson Tangob, 23, ulitawo, nga lumad nga taga barangay Sangat, lungsod sa San Fernando, kinsa nagtrabaho sa usa ka establisamento sa maong dapit.

Si SPO3 Renato Valle sa kapolisan sa Presinto 3 sa Basak Police Station nga nagbase sa barangay Basak sa dakbayan sa Mandaue miingon nga puwerting hadloka sa mga kustomer sa maong videokehan tungod kay nagtuo sila nga habason sila sa suspetsado.

Ang tag-iya sa maong videokehan maoy mipahibalo dayon sa kapolisan sa Presinto 3.

Nasakmit   sa mga otoridad ang pinuti sa suspetsado ug nasakpan usab kini nga positibo sa ilimnong makahubog   dihang gipaubos kini sa liquor test sa Mandaue City Hospital.

Ang nasakmit nga pinuti   may gitas-ong 24 ka pulgada.

Gitanggong karon sa sulod sa detention cell sa Presinto 3 ang maong dinakpan ug gikatakdang pasakaan kini sa kalapasan sa Batas Pambansa Bilang 6 kon concealing of deadly weapon ug kalapasan sa ordinansa nga nagdili sa paghuboghubog o sa pagpakita ngadto sa publiko. (BANAT NEWS)