CEBU, Philippines - Giawhag ang Department of Labor and Employment (DOLE)-7 nga monitoron ang mga balay patigayon sa siyudad sa Sugbu kung mituman ba sila sa pagpanghatag og 13th Month Pay sa ilang mga empleyado.
Si Konsehal Alvin miduso og resolusyon aron awhagon ang DOLE pagsusi kung gisunod sa mga negosyante ang Presidential Decree No. 851 nga nagmandong kinahanglang mohatag ang mga kompanya og 13th month pay.
Matud pa sa konsehal nga nagkaduol na ang Pasko ug dako kaayo og ikatabang alang sa mga mamumuo ang 13th month pay.
Gipasidan-an ni Dizon ang mga negosyante nga ang mga trabahante maoy naglihok aron molambo ang ilang negosyo.
Gawas sa DOLE, ang resolusyon ni Dizon miawhag usab sa Cebu Chamber of Commerce and Industry (CCCI) nga mandoan ang ilang mga miyembro nga hugot gyud nga motuman sa balaod.
Si Dizon miawhag usab sa DOLE sa pagbutang og hotline sa ilang buhatan aron adunay kasumbongan ang mga trabahante ilabi na kadtong atoa sa lagyong dapit.
Sagad sa mga trabahante karon nasayran nga mas pilion pang magpakahilom bisan giagrabyado na sa ilang mga agalon tungod usab sa kahadlok nga mawad-ag trabaho. (BANAT NEWS)