2 motorsiklo nagsampok 2 patay

CEBU, Philippines - Sagitsit sa duha ka sakyanan dayon ang lanog nga lagubo maoy nakapamata sa nangatulog nga mga residente sa barangay Arpili, Balamban human magsabong ang duha ka motorsiklo ug nangalagpot ang mga sakay niini kagahapon sa kaadlawon ug mikalas ug duha ug duha usab ang naangol.

Patay diha-diha si Dario Tabor, 33, taga barangay Abucayan ug drayber sa Honda XRM nga adunay plaka nga YQ-3201 samtang si Boylet Abarrido, 21, taga sitio Casili sa maong barangay ug drayber sa Kawasaki Fury nga nagtangag sab plaka nga 6828-YZ patay usab nga nahidangat sa Bogo District Hospital.

Ang angkas sa duha ka motorsiklo nga sila si Jerome Idemni, 16 ug usa ka babayeng naila lang sa pangalang Jean pulos nakaangkon og grabeng kadaot sa ilang kalawasan gidala sa susamang hospital ug gibalhin ngadto sa Don Vicente Sotto Memorial Medical Center.

Matud ni PO1 Godofredo Dumdum nga si Abarrido paingon sa barangay Buanoy dihang kalit nga mi-overtake sa nag-unang motorsiklo ug wala makabantay ni Tabor nga paingon usab sa siyudad sa Toledo. 

Matud ni Dumdum wala’y head light ug nag-ekis-ekis nang daan ang dagan sa motor ni Tabor ug wala makabantay gilayon si Abarrido. (BANAT NEWS)