Giunay'g pusil angol sa kauban

CEBU, Philippines - Samdan sa buko-buko ang usa ka lalaki nga misuway unta pagpusil sa usa ka seaman dihang siya hinuoy napusilan sa iya ra usab nga kauban didto sa sitio Magpalacir, barangay Hipodromo ning dakbayan sa Sugbo sa miaging gabii.

Ang biktima nailhan nga si Leonar Flores, usa ka manindahay og tubig nga taga barangay Carreta kansang target unta sa pagpamusil mao si Mark Niel Labiste, 30, usa ka seaman nga iya ra usab nga silingan. Sumala sa kapolisan nga naglakaw sa karsada si Labiste uban ang iyang asawa kay magpalit og tambal sa usa ka botika sa ilang lugar.

Apan kalit nga misugat kanila si Flores nga nagbitbit og armas de fuego dayong pusil kang Labiste makaduha ka higayon. Apan tungod sa kaabtik ni Labiste wala kini maigo sa mga bala ni Flores.

Dihang nakita  sa kauban ni Flores nga wala maigo si Labiste, ang maong kauban sa nahauna nga wala hiilhi maoy mitiro kang Labiste dihang ang bala niini didto motugpa sa buko-buko ni Flores.

Si Flores kinsa maoy nahimong suspetsadong biktima nakapanlingo ug nagkanayon nga puwerting dimalasa sa iyang kinabuhi.

Kay dihadiha gisikop dayon siya sa mga barangay tanod sa maong lugar ug gihatod hinuon dayon ngadto sa Cebu City Medical Center aron malibre.

Nasakmit sa kapolisan gikan ni Flores mao ang usa ka kalibre .357 nga maoy gigamit sa maong suspetsado sa pagbugha unta kang Labiste.

Si PO3 Leroy Baguio, sa Homicide Section mibutyag sa Banat News nga si Flores gikulata diay kuno ni Labiste sa miaging semana hinungdan nga nagdumot kini sa naulahi.

Samtang wala usab mikompirmar si Baguio sa estorya nga drugas ang hinungdan sa maong pagpamusil. (WC) (BANATNEWS)