Driver gitabanga'g patay sa magsoon

CEBU, Philippines - Namatay ang usa ka drayber sa traysikad human kini tabangi og dunggab sa managsoon niyang silingan didto sa sitio Tangke sa barangay Basak, dakbayan sa Lapulapu sa miaging gabii.

Ang biktima mao si Jose Rizaldo Tampus, 48, ulitawo, nga taga sitio San Vicente sa barangay Basak sa maong dakbayan, samtang ang mga suspetsado mao sila si Elmer ug Melchor Lubas nga pulos hingkod ug silingan ra sa biktima. Si SPO1 Manolito Abellanosa sa homicide section sa kapolisan sa maong dakbayan nga nahinabi sa Banat News miingon nga naglakaw pauli sa ilang balay ang biktima.

Apan dihang naagian niya nga nag-inom ang mga suspek, gisundan siya  niini ug paghiabot sa usa ka ngitngit nga bahin sa karsada, wala siya makalikay dihang gitabangan siya og luba sa duha.

Matud pa ni SPO1 Abellanosa nga ang mga barangay tanod sa maong barangay maoy mihatud dayon sa biktima ngadto sa Mactan Doctor Hospital diin didto kini ideklarar nga patay na.

Nasuta sa kapolisan nga daan nang may panagbangi ang biktima ug ang mga suspek tungod gipasanginlan kuno sa biktima ang mga suspek nga maoy nangawat sa mga manok sa ilang lugar.

Padayon pang gipangita sa kapolisan ang mga suspetsado kinsa milayas dayon human sa maong hitabo.  (BANATNEWS)