Ginang misuway'g palusot og shabu sa jail nadakpan

CEBU, Philippines - Usa ka biyuda ang gipaslak sa prisohan human kini pasanginling misuway pagpalusot og ilegal nga drugas diha sa Lapulapu City Jail apan nasakpan sa mga jail guards.

Ang gidakop mao si Neneth Veloso, 43, biyuda alyas Josephine Bensi ug residente sa barangay Cambaro dakbayan sa Mandaue human nakuhaan og 102 ka gagmay’ng pakete sa gituohang shabu.

Matud pa ni JO1 Josie Danias sa pagsulod ni Veloso mga alas 3:25 sa milabay’ng hapon nakamatikod na sila sa kadudahan niining linihokan. Dihang misulod na kini sa inspection room ug girekisa nadiskobrehan sa iyang panyo nga gikuptan ang maong ilegal nga drugas.

Atol sa imbestigasyon si Veloso mipadayag nga gisugo siya sa kapuyo sa iyang higala nga nag-atang kaniya gawas sa Lapulapu City Jail sa pagdala niini sa sulod.

Matud pa nga buot sa iyang higala nga ipabutang sa usa ka payag ang maong panyo kay adunay tawong mokuha niini. Sumala pa niya nga wala siya mahibalong shabu ang sulod sa papel nga giputos sa panyo.

Si Veloso nangangkong gipamalihogan ra siya sa iyang amiga tungod kay padulong siyang mobisita sa iyang uyab nga si Danny Limotan sa maong bilanggoan.

Ang 102 ka mga gagmay’ng paketeng shabu gibanabanang mokantidad sa P20,400 sa tag 200 pesos matag usa.

Kasong kalapasan sa RA 9165 ubos sa sec. 5, 11 ug 12 sa Art. II ang ipasaka sa BJMP batok ni Veloso kinsa anaa na karon sa bilanggoan.

Dili palang dugay, nabisto usab ang laing paagi pagpalusot og ilegal nga drugas sa maong bilanggoan diha sa gibuslotang kural. (BANATNEWS)