Gikulata kay wa makig-sex

CEBU, Philippines - Naglisud na paglakaw tungod sa grabing bun-og ug na black eye pa ang duha ka mata sa usa ka 33-anyos nga ginang dihang gikulata sa palahubog nga bana nga giingong nasuko kay gibalibaran sa hangyo nga makighilawas.

Ang pagpangulata nahitabo sa usa sa mga barangay sa lungsod sa Dalaguete kagahapon sa sayo pa sa buntag ug tungod sa kagrabe sa pagkabun-og sa biktima giagak nalang kini sa duha ka mga anak ngadto sa presinto.

Ang mag-uumang suspek nga 44-anyos (pangalan gipugngan) kasamtangang gibalhog sa karsel sa Dalaguete police station human madakpi kagahapon.           

Matud ni SPO1 Veronico Centino sa Dalaguete Police Station dihang nahinabi sa Banat News nabuntagan gikan sa pakig-inom ang suspek ug pag-abot sa balay nahitabo ang ilang panag-away sa biktima.

Sumala pa nga hubog kini kaayo ug giingong ‘nanguhit’ sa biktima apan gumikan sa kahubog sa bana wala kini tagda apan miulbo ang kasuko niini ug mitumaw ang panaglalis nga naglakip sa pagselos.

Tunga-tunga sa ilang tinubagay giingong gikulata sa suspek ang asawa ug giyatak-yatakan ang ginang kinsa nalup-og na niadtong tungora.

Ang kapitan sa barangay nga si kapitan Bonifacio Tampus uban sa mga tanod maoy daling nakaresponde tungod sa mga silingang nangayo og tabang nga nakadungog sa pagping-it sa ginang.

Dugang nahipos nga inpormasyon sa kapolisan gikan sa mga silingan nga matag mahubog ang suspek moandar gyud kini pagpangulata sa iyang asawa ug dala sa grabeng pagselos.

Ang biktima sumala pa ni Centino naglisod na sa paglakaw ug kinahanglang agakon pa aron makalihok. Gitambagan nila kini sa pagpakurasyon aron isuporta sa kasong ilang ipasaka batok sa suspek.

Kung pasakaan og kaso sa ginang ang suspek hayan mag-atubang kini og kasong kalapasan sa Violence Against Womens and Children Act. (EIM) (BANATNEWS)