Love triangle gisubay sa pagpusil sa welder

CEBU, Philippines - Giatangan ug gipusil patay ang usa ka welder sa Tsuneishi Heavy Industries sa lungsod sa Balamban samtang nagmaneho sa iyang motorsiklo paingon na mopauli sa sitio Kamanggahan sa barangay Buanoy lungsod sa Balamban niadtong Miyerkules sa alas 10:00 sa gabii.

Ang biktima nga namatay dihadiha mao si Joel Cagulada Labaya, 39, molupyo sa Cogon-Pardo siyudad sa Sugbo ug temporaryong nagpuyo sa barangay Buanoy ug welder sa Rens Services nga kontraktor sa Tsuneishi Heavy Industries. Wala pa matumbok sa kapulisan sa paghimo ning balita ang mamumuno sanglit mingaw ug ngitngit ang lugar nga nahitaboan sa krimen. Matud ni PO2 Hannibal Larida sa Balamban Police Station dihang nahinabi sa Banat News gikan nakig-inom sa iyang mga higala sa sitio Maigang sa barangay Arpili ang biktima.

Apan pag-abot sa nahitaboan kalit kining gipusil makadaghang higayon ug nakaangkon og duha ka samad pinusilan sa bukobuko nga milapos sa dughan.

Pag-abot sa nirespondi nga mga polis nagbuy-od na ang biktima sa karsada ug nadat-ogan sa iyang motorsiklo.

Ang kapulisan naka-recover sa cellphone sa biktima. Sumala pang Larida dihang nakuptan na sa mga polis ang cellphone dihay usa ka babayeng nagpailang uyab sa biktima ug nangangkong atoa kini sa gawas sa nasud ang nanawag sa maong cellphone.

Matud pa nga ang maong babaye miingon nga iyang gitawgan ang biktima aron mangutana kung tinuod ba kining napusilan.

Gawas niini matud ni Larida dunay daghang text message diha sa cellphone nga gituohang gikan sa babaye nga gikarelasyon niini.

Nasuta usab nga ang asawa sa biktima atua magtrabaho sa gawas sa nasud, gisusi usab sa kapolisan ang report nga giingong aduna kini laing karelasyon nga minyo nga posibleng maoy motibo sa maong krimen. (BANATNEWS)