CEBU, Philippines - Way swerte ang 70-anyos nga lola human nadakpan sa buybust operation sa kapolisan batok kaniya ug sa iyang anak tungod sa pagpamaligya og ginadiling drugas diha sa sitio Central barangay Langtad siyudad sa Naga niadtong Miyerkules sa alas 8:30 sa gabii.
Ang nasikop mao si Margarita Genoviana, 70, molupyo sa maong lugar samtang gipangita pa sa kapolisan ang anak niining nakaeskapo nga si Wendell Genoviana.
Matud ni PO2 Niño Perolino sa Naga City Police Station dihang nahinabi sa Banat News wala makabantay si Margarita nga polis diay ang nakig-transaksyon kaniya nga mopalit og marijuana.
Atol sa buy bust operation ang suspek mao gyuy mitunol sa usa ka linikit nga tissue nga giporma og sigarilyo nga dunay sulod nga marijuana ngadto sa polis nga poseur buyer sa kantidad nga P100.
Dihang gitunol niini ang linikit nga marijuana gidakop dayon kini sa mga polis ug nakuhaan og laing napulo ka linikit nga marijuana diha sa iyang bulsa nga gisud og plastic.
Sunod nga giadto sa mga polis ug gisuwayan pagpalit og marijuana mao ang anak niini nga gipalitan og P50 nga marijuana apan nakabantay kini ug misutoy og dagan.
Sa laing operasyon, ang kapolisan sa Danao misikop sa gipasanginlang level 2 drug pusher nga si Feleciano Bueno, 32, human mobaligya og shabu sa police decoy diha sa barangay Looc sa maong dakbayan sa miaging gabii.
Si SPO2 Ildefonso Prosia human itunol sa suspek ang usa ka pakete nga shabu bugti sa P300 nga bayad dali kining gisignit sa mga polis ug dihang girekisa maoy nakuha ang lain pang walo ka paketeng shabu.
Kasong kalapasan sa Republic Act 9165 kon Comprehensive Dangerous Drug Act of 2002 ang ipasaka batok sa mga suspek.(/EIM) (BANATNEWS)