Lamppost controversy nakaleksyon ni Teddy

CEBU, Philippines - Nakahatag og leksiyon kang kanhi Mandaue City Mayor Thadeo Ouano nga karon board member sa ikaunom nga distrito sa lalawigan sa Sugbo ang kasong gipasaka ug nabasura batok kaniya kabahin sa kontrobersyal nga lamppost.

Si Ouano miingon nga naamgohan niya nga dili gyud diay maayong magpataka og sanong sa gitanyag nga proyekto gikan sa nasudnong kagamhanan sanglit kung may mga kahiwian malambigit man ang mga lokal nga opisyal nga hingtungdan.

Gipasabot ni Ouano nga nabasura ang mga kaso nga iyang giatubang didto sa Sandiganbayan sanglit nakita nga wala makahimo sa gipasangil nga kahiwian.

Si Ouano subling mipasabot nga miabag ra ang siyudad kaniadto sa katumanan sa maong proyekto.

Ang maong mga lamppost (decorative) gipamutang sa daplin sa dalan sa Metro Cebu ilabi na sa rotang giagian kaniadto sa mga lider sa nagkadaiyang nasud sa Association of South East Asian Nations (ASEAN) pipila ka tuig na ang nakalabay.

Apan nadiskubrehang overpriced kini ug nakasuhan ang mga lokal nga opisyales sa mga siyudad nga mipirma sa pagbutang niini sa ilang siyudad apan nakapahibulong kang Ouano nganong wala apila sa kiha ang mga labaw sa Department of Public Works and Highways (DPWH) sa ulohang buhatan. (/EIM) (BANATNEWS)