Anak ni Greg way plano sa politika

CEBU, Philippines - Ang anak ni kanhi bise gobernador Gregorio Sanchez Jr. nga si Grecilda Sanchez-Zaballero ang nanghatag og mga kupon alang sa mga Talisaynon sa milabay’ng adlaw.

Apan giklaro dayon ni Zaballero nga dili kini lakang aron siya mosulod sa politika o mangandoy nga mohupot og posisyon sa gobiyerno.

Niadtong Martes sa buntag si Zaballero kinsa maoy regional coordinator sa Compañero Cayetano Tabang Volunteer (CCTV) mianha sa Talisay City Hall ug mitunol sa tulo ka mga konsehal sa oposisyon nga sila si Romeo Villarante, Val Ylanan ug Danny Caballero sa balor P50mil nga kupon.

Matud ni Zaballero nga ang maghupot sa maong kupon makakuha og tambal sa botika nga nagkantidad og P1,000 basta ipakita lang ang resita lakip ang kupon.

Ang nahisgutang mga konsehal mao na unya ang moapod-apod sa mga kupon ngadto sa mga Talisaynon nga nanginahanglan.

Gipasabot ni Zaballero nga wala silay pilion nga hatagan sa maong hinabang. “It’s available for anybody regardless of political affiliation.”

Gibutyag niya nga ang pundo sa maong proyekto naggikan sa Manila sa CCTV.

Ang tulo ka nahisgutang konsehal mipadangat og hangyo ngadto sa buhatan ni Zaballero aron mahatagan sila og tabang.

Si Zaballero wala buhii sa mga sakop sa media kung dili matubag ang pangutanang may plano ba kining mosunod sa tunob sa iyang amahan nga si anhing bise gobernador Gregorio “Greg” Sanchez.

 “That is not yet in my plan… sa among family, I don’t think will go into that (walay plano modagan ang uban sakop sa ilang pamilya), pure lang gyud ni ako 100 percent volunteer,” tubag pa niini.

Kahinumduman nga ang tulo ka nahisgutang konsehal kaalyado ni kanhi Bise Gobernador Gregorio Sanchez sa Liberal Party. (BANATNEWS)