De karga vs. motorsiklo ex-army namatay

CEBU, Philippines - Namatay ang usa ka retiradong army dihang mibangga sa trak de karga ang iyang gimaneho nga motorsiklo didto sa barangay Pandakan sa lungsod sa Pinamungajan niadtong Martes sa alas 9:00 sa buntag.

Ang biktima mao si Rolando Villacampa, 54, retired army ug molupyo sa maong lugar, samtang ang drayber sa trak de karga mao si Olimpio Soterio, 28, ulitawo, ug lumad nga taga Maranding, Lanao Del Norte apan stay-in worker sa trabahoan sa iyang amo nga si Jose Aurita, hingkod ang panuigon ug taga Magdugo, siyudad sa Toledo.

Si PO2 Junard Singco sa Pinamungajan Police mibutyag sa Banat News nga ang trak de karga puno sa bas ug graba nga paingon na untang mag-deliver niini sa ilang kustomer didto sa lungsod sa Moalboal.

Apan pag-abot sa maong lugar ang motorsiklo sa biktima nga kusog usab kaayong nagdagan mi-overtake sa nag-una niini sikad-sikad ug didto mapunta sa gikasugat nga de karga hinungdan nga nadagit kini ug naguyod pipila ka metros sa karsada uban sa iyang motorsiklo ug namatay. (BANAT NEWS)