CEBU, Philippines - Gitunol na sa Cebu Provincial School Board (CPSB) ngadto sa delegasyon sa probinsiya sa Sugbo ang kapin sa P3 milyones nga pundo alang sa mga atleta ug mga coach nga makigsangka sa Central Visayas Regional Athletic Association (CVRAA) Meet 2011 sa dakbayan sa Tagbilaran lalawigan sa Bohol.
Si Gobernador Gwendolyn Garcia nga maoy pangulo sa CPSB mipirma nang daan sa Summary of Budgetary Requirement sa CVRAA Meet nga naglangkob sa pagkaon , transportasyon, toiletries ug mga uniporme sa mga atleta sa wala pa kini mogikan paingon sa Latin America.
Subay niini, si Nenita Jaralve, coordinator sa Division of Cebu Province Culture office nagpasalamat sa tabang nga gihatag ni Gobernador Garcia ngadto kanila.
Ang delegasyon sa Cebu Province naglakip sa 747 ka tawo nga langkoban sa 178 ka atleta ug 63 ka mga coach, assistant coach, mga trainer ug chaperone alang sa elementary level.
Ang secondary level gilangkoban usab sa 238 ka atleta, 67 ka coach, assistant coach, trainer ug mga chaperone.
Uban usab nila ang 113 ka mga opisyal delegation , 60 ka regional officiating officials ug 28 ka Honorary officials.
Napanglantawan sa mga tigpaniid nga manghawod ang delegasyon sa probinsiya sa Sugbo sa natad sa volleyball ug athletics.
Ang CVIRAA MEET ning tuiga molanat og lima ka adlaw sugod sa Nobiyembre 28 hangtod sa Disyembre 2, ning tuiga.(Chester Abadilla/WC) (BANAT)