Cebu nahimo nang Volleyball Capital

CEBU, Philippines - Lain na usab nga makasaysayanong dungog ang naangkon sa mga atletang Sugbo-anon human madeklarar ang Sugbo nga Volleybal Capital of the Philippines sa Philippine Volleyball Federation.

Gikalipay kaayo ni Gobernador Gwen Garcia ang maong kaugmaran human masayri nga giyabo sa mga magduduwa sa volleyball nga Sugboanon ang ilang mga kaatbang gikan sa Luzon, National Capital Region (NCR) ug Mindanao ug nahimo silang kampiyon sa Milo Olympics National Finals.

Ang Abellana National School (ANS) mipildi sa Luzon ug nalangkat ang secondary boys title sa score nga 25-18 ug 25-21.

Samtang ang Pajo National High School miyabo usab sa Luzon ug naangkon ang secondary girls title sa score nga 25-14, 25-13.

Sa Elementary level, midaug ang Colegio del Sto. Niño batok sa team sa Mindanao ug nakuha ang boys title samtang milampos usab ang mga magduduwa sa Catmon sa pagpukan sa NCR ug nanghawod sa girls title.

Si Winnona Catipay ang Executive Director sa Guv Cup mipahibawo nga gumikan sa kalipay sa gobernador gipahalipayan niini ang naglangkob sa Cebuano Volleyball Players gumikan sa naasoy nga kalamposan.

Walo ka magduduwa sa volleyball sa Abellana National School nakatampo sa kalamposan nga maoy   garbo sa Guv Cup, nga usa sa mga proyekto ni Gobernador Garcia.(Chester Abadilla/WC) (BANAT)