P50M pautang gidepensahan ni Rama

CEBU, Philippines - Gidepensahan ni Mayor Michael Rama ang giduso niya nga P50 milyones nga budget alang sa sunod tuig nga maoy gamiton sa pagpa-loan ngadto sa mga kawani sa Cebu City Hall.

Sumala pa ni Rama nga dako kaayo og tabang ang maong budget gumikan kay gamay lang ang ipatong nga interest niini dili sama sa mga pribadong lending firms nga dako kaayo og tubo.

Wala pa hinuon masayri kung pila ang tubo kung madayon ang maong plano ni Rama gumikan kay ang maong sugyot kinahanglan pa nga mag-agi og diskusyon sa konseho.

Matud pa ni Rama nga naluoy siya sa iyang mga empleyado nga naputos sa utang nga naglisod intawon og bayad gumikan sa kadakong tubo.

Nasayran nga mao kini ang unang higayon sa dakbayan sa Sugbo nga gilakip sa budget proposal ang pautang nga salapi alang sa mga empleyado.

Nasayran nga natuki na usab sa budget conference sa konseho ang maong proposal ug dunay pipila ka konsehal ang mikwestyon niini gumikan kay duna na’y kasamtangang Bayanihan Cooperative ang City Hall nga nagpautang usab sa mga empleyado.

Apan si City Administrator Jose Marie Poblete mipadayag nga dili tanang empleyado ang sakop sa maong kooperatiba ug mao kini ang hinungdan nga nakahuna-huna ang mayor sa paggahin og budget kung diin ang tanang empleyado mahimong makautang.

Gipadayag hinuon ni Poblete nga ang executive department magpatabang sa konseho sa paghimo og mga lagda sa nahisgutang programa aron dili kini maabusaran. (BANAT NEWS)