Ouano mitabang sa biktima sa sunog

CEBU, Philippines - Gihangop sa mga biktima sa sunog sa dakbayan sa Mandaue ang hinabang pagkaon nga gihatag kanila ni 6th District Board Member Thadeo Ouano.

Ang nakadawat sa maong mga hinabang mao ang mga biktima sa sunog sa sitio Pulang Bukid sa barangay Alang-Alang, sa maong dakbayan nga gipagba sa kayo sa miaging semana.

Ang mga gipanghatag ni Ouano mao ang 20 ka sakong bugas, napulo ka kahon sa mga linatang sardinas, 15 ka mga kahon sa noddles , 100 ka banig, 100 ka habol, 100 ka ginamiton sa kusina ug uban pa.

Si Ouano nga nahinabi sa Banat News miingon nga gihatag niya ang maong hinabang   ngadto sa mga biktima sa tumong nga makatabang siya sa mga panginahanglan nila.

Sa nasayran nga mikabat sa 200 ka pamilya   ang nawad-an sa ilang mga balay human moulbo sa kayo sa maong lugar, nga gituohang naggumikan sa depektusong linya sa kuryente sumala pa ni FO3 Cefriano Codilla sa Bureau of Fire Protection sa dakbayan sa Mandaue

Gumikan  niini si Codilla miingon nga kinahanglang susihon gyud pirme sa tagbalay ang ilang instalasyon sa kuryente aron kalikayan ang sunog.

Gitataw niya nga angay magmatngon ang mga molupyo sa ilang pagpalit og mga butang sama sa electric fan, ceiling fan, series light ug uban pang baratohon nga appliances nga de kuryente kay sagad mao   kini ang hinungdan sa sunog. (BANAT NEWS)