Mipusil sa driver sa taxi nakalayas

CEBU, Philippines - Ang duha ka tawo nga mitulis ug mipusil sa usa ka drayber sa taksi niadtong Lunes sa kaadlawon sa sitio Rafael, barangay San Roque, sa dakbayan sa Talisay giingong milayas na ug wala na karon sa maong dakbayan.

Ang biktima giila nga si Jimmy Bacaro, 49, nga taga barangay Subangdaku, dakbayan sa Mandaue ug drayber sa Trellos Taxi nga nagtangag sa plakang GWS-757 ug adunay body number nga 2185.

Si Bacaro nakaangkon og samad pinusilan sa walang bahin sa iyang apapangig ug gihuwat pa karon sa mga polis nga makasulti kini aron makuhaan og pamahayag.

Ang mga suspetsadong tulisan nailhan nga sila si Lexter Louie Macachor, 19, ug Ariel Padin, 18, nga pulos taga barangay Tanke kinsa nakatulis og P3,250 nga kinitaan   sa pamasahero ni Bacaro.

Si SPO1 Mikie Espina nga nahinabi sa Banat News kagahapon mibutyag nga base sa ilang nahipos nga impormasyon si Macachor napriso na sa Talisay City Jail tungod sa kasong “snatching” o pagpanglabni ug niadtong Marso 3, 2011 lang kini nakagawas.

May taho nga ang pasaherong magtiayon ni Bacaro gilakip usab sa pagtulis sa mga suspetsado.

Apan si Espina wala mokompirma niini ug nagkanayon nga kun adunay laing nabiktima sa tulis, mas maayong moduol sa ilang buhatan. Si Espina midugang nga kung dili nila masikop ang mga suspetsado sa ilang gipahigayong hot pursuit operation pasakaan na nila kini og kaso aron malutsan og warrant of arrest. (BANAT NEWS)