CEBU, Philippines - Suspendido og duha ka buwan sa iyang trabaho ang hepe sa kapolisan sa dakbayan sa Toledo nga si Chief Insp. Jovito Canlapan, matud pa ni Sr. Supt. Patrocenio Comendador, ang hepe sa Cebu Provincial Police Office kagahapon.
Sumala ni Comendador nga ang mando sa Visayas Ombudsman sa suspension ni Canlapan nga walay suweldo gipaepekto sugod niadtong Nobiyembre 15, 2011.
Hinuon matud pa ni Comendador nga wala niya hisayri kun unsang kasoha ni Canlapan nga nahimong sukaranan sa iyang pagkasuspenso.
Kini tungod kay matud pa niya nga may upat ka mga kaso nga gisang-at kang Canlapan kaniadtong siya pa maoy hepe sa Daanbantayan Police Station sa miaging tuig.
Matud pa sa hepe sa CPPO nga usa sa mga kasong giatubang ni Canlapan mao ang pagsikop niini sa usa ka drayber sa Rough Riders nga nakaligis og bata ug gilakip niya ang pagtanggong sa sakyanan.
Mipasabot si Comendador nga napiit si Canlapan sa maong kaso dihang miatras sa ilang kiha batok sa drayber ang mga tagtungod sa biktima.
Si Comendador mipadayag og kahanugon kang Canlapan ilabi na karong mipakita kini og maayong trabaho sa iyang destino sa dakbayan sa Toledo .
Hinuon sa pagkakaron may itudlo si Comendador nga OIC chief sa Toledo Police Station samtang suspendido pa si Canlapan. – WC (BANAT NEWS)