Misyonero natripingan gipusil

CEBU, Philippines - Dili gyud tanang mga langyaw mokatawa kun sampiton og ‘Hey Joe’ ‘Hey Joe’ kay ang usa ka misyonerong langyaw nga gitawag sa duha ka mga lalaki ang napusilan hinuon tungod niini sa miaging alas-2 sa hapon diha sa sitio Kalubihan sa barangay Guadalupe siyudad sa Sugbu.

Si Francis Gosgrave Xavier, 40, Irish National, usa ka missionary sa Bible Baptist Church ug nagpuyo sa Don Gervacio Quijada St., sa naasoy’ng barangay nakaangkon og samad pinusilan sa tuong paa ug anaa karun sa Chung Hua Hospital.

Nailhan hinuon sa kapulisan ang manag-agaw’ng Caballes nga sila si Juniel ug Francis temporaryong nagpuyo sa maong lugar nga maoy gitumbok nga responsable sa pagpusil sa biktima.

Sa pasiunang imbestigasyon ni PO3 Geoffrey Gutual, PO2 Lou Pagara, PO2 Leo Pequero, PO2 Julius Regis sa Homicide Section nagbutyag nga nagsakay sa mountain bike ang biktima kuyog iyang anak nga nag-jogging niadtong tungora diha sa maong lugar. Ilang naagian ang duha ka suspetsado nga naglingkod sa daplin sa karsada ug misinggit kaniya og ‘Hey Joe’ ‘Hey Joe’ nga nagkinataw-anay.

Daw nainsulto ang biktima mihunong siya ug giduol ug gikomprontase ang duha apan misangpot hinuon sa ilang panaglalis. Dihang mobiya na si Xavier wala kini makabantay nga armado si Juniel ug kalit mipusil kaniya. Ang duha daling mikaratel og dagan samtang gitabang sa mga residente si Xavier pagdala sa tambalanan.

Ang kapulisan daling mihimo og follow-up operation apan pakyas sila pagsikop sa duha ka suspetsado. (BANAT NEWS)