Maestro ug layko naghikog

CEBU, Philippines - Patay ang usa ka magtutudlo sa usa ka publikong tulunghaan sa dakbayan sa Lapulapu nga gituohang naghikog human gibuwagan sa iyang uyab ginamit ang higot sa iro nga maoy gibitik sa iyang liog sa sulod sa boarding house sa iyang higala sa barangay Tugbongan sa lungsod sa Consolacion alas 6 pasado ang takna sa miaging Domingo sa gabii nga nadiskubrehan.

Si PO2 Johnaskie Romero sa Consolacion Police Station miila sa namatay nga mao si Marlon Sadomia, 29, taga barangay Marigondon, dakbayan sa Lapulapu ug magtutudlo sa Marigondon National High School sa samang dakbayan.

Matud pa ni Romero, si Sadomia miabot sa boarding house sa mga higalang sila si John Pons Tiu ug Eunice Melania alas-3 pasado sa hapon niadtong miaging Sabado diha sa barangay Tugbongan.

Sa pamahayag nila ni Melania ug Tiu sa kapolisan giingong nanghagad kini nga makig-inom butang nga ilaha usab gidalit kang Sadomia apan nianang pagkatunga nang gabii misugilon kini kabahin sa giingong pagluib kaniya sa iyang uyab nga nagtrabaho sa usa ka mall sa dakbayan sa Mandaue.

Matud pa ni Romero nga nianang pagkasunod adlaw nga Domingo sayo sa buntag ilahang gitugon si Sadomia kinsa diha na nakatulog sa ilang boarding house sa pagkandado sa balay kung buot na kini mouli sanglit motrabaho na sila nianang adlawa.

Apan sa pagkagabii sa ilang pag-abot nahibulong nalang sila nga wala magsiga ang suga sa ilang boarding house apan nakasira sa sulod hinungdan nga nangayo sila og tabang sa tag-iya sa maong boarding house nga si Salvador Casinello kinsa misugo usab og bata sa pagkatkat sa bintana aron maablihan ang pultahan diha sa sulod.

Apan gikakugang nila pagpasiga nila sa suga nga nagbitay na gikan sa kisame si Sadomia ug wala nay kinabuhi. Gisusi pa sa kapolisan kung aduna bay foul play sa kamatayon ni Sadomia bisan pa man sa pamahayag sa mga higala niini.

Samtang sa laing hitabo sa paghikog, usa ka lay minister ang napalgan sa iyang anak nga naglaslas na sa pulso ug may pisi sa liog niini diha sa Purok Tambis, sa barangay Ibabao Estancia sa dakbayan sa Mandaue.

Ang gituohang nagpakamatay mao si Meliton Portado, 69, ug residente sa maong dapit usa ka lay minister sa Christ the King Parish.

Matud pa ni Jasmine (anak ni Portado) mga alas 4:17 sa milabay’ng adlaw iyang giduaw ang amahan apan misugat kaniya ang talan-awong nagbitay na kini sa ilang hagdanan ug wala nay kinabuhi.

Sa paghiling sa mga polis sa lawas ni Portado aduna sad kini nilaslasan sa iyang walang pulso gamit ang usa ka cutter.

Pipila ka mga residente sa maong dapit ang dili makatuo nga problemado si Portado gumikan kay gihulagway nila kining siawon ug matinagdanon.

Matud pa ni Jasmine dugay nang wala maduaw sa iyang inahan ang iyang papa gumikan kay atua kini sa probinsiya nagbantay sa ilang mga anak.

Ang kapolisan sa MCPO nagtoo nga unang gilaslas ni Portado ang iyang pulso una pa kini naghikog pinaagi sa pisi nga gihikot sa railings sa hagdanan hinungdan sa pagkatuok ug pagkamatay niini.

Dili palang dugay gibansagan ang Sugbu nga ‘suicide capital’ sa nasud nunot sa gidaghanon sa mga insidente sa paghikog matag semana ning mga nanglabay’ng mga buwan.

Sagad sa mga naghikog adunay problema sa gugma, kalisod sa kinabuhi ug adunay gihambing sakit.

Samtang nasuta nga dili lang mga lalaki maoy sagad maghikog sanglit hasta mga babaye mihimo niini apan gamay ra kanila ang milampos tungod sa pamaaging ilang gigamit pagsuway paghikog komparar sa kalalakin-ang nadesperado sa kinabuhi. (Uban sa report nila ni Darrel Carumba ug Bong Soriano/EIM) (BANATNEWS)