CEBU, Philippines - Ang pagsuspenso og unom ka buwan sa usa ka maestro sa tulunghaang publiko sa dakbayan sa Sugbo magsilbing warning sa mga kawani sa kagamhanan gikan sa pagsuway og pahimulos sa gahum nga gitahas kaniya, sumala pa ni Deputy Ombudsman Pelagio Apostol sa Office of the Ombudsman Visayas.
Kini may labot sa pagsuspenso niya og unom ka buwan kang Raul Bayotlang, 28, usa ka electronic teacher sa Abellana National School ning dakbayan sa Sugbo.
Matud pa ni Apostol nga ang maong kamandoan iyang gihimo aron nga di mabulit sa mga maot ug dautang komentaryo ang nahisgutang magtutudlo ug sa samang higayong dili siya makahimo sa panginpluwensya sa mga mosaksi batok kaniya.
Ang kaso ni Bayotlang may labot sa pasangil nga nanamastamas kini sa 13 anyos nga estudyante sa tulunghaan nga iyang gialagaran.
Ang lakang ni Pelayo gihimo subay sa hangyo sa inahan sa biktima nga ipasuspenso kini samtang padayon pang bistahon ang kasong ilang gisang-at sa korte batok sa sinumbong.
Apan sumala ni Apostol nga dili lamang tungod sa hangyo sa inahan sa biktima kundi gibase niya sa mga ebidensya nga gipresentar sa kihante diin kun mamatud-an kini , hayan nga matangtang siya sa hingpit sa iyang iyang trabaho isip magtutudlo sa eskuylanan sa gobiyerno.
Mahinumdoman nga ang abogado ni Bayotlang nga si manlalabanWendell Quiban miduso og temporary restraining order (TRO) ug injunction batok ni Apostol ug ni Department of Education (DepEd) 7 Director Recaredo Borgonia nga nagahangyo nga ipahunong ang pag-implementar sa suspension order.
Matud pa ni Quiban nga ang pagpatuman sa suspension order usa ka illegal kay nakalapas kini sa constitutional rights ni Bayotlang tungod sa kakuwang sa due process.
Apan ang maong hangyo gibasura kini ni Executive Judge Silvestre Maamo. (BANAT NEWS)