Taga Mandaue napusilan sa Talisay

CEBU, Philippines -  Nalandig sa tambalanan ang usa ka lalaki nga taga dakbayan sa Mandaue human kini pusila sa wala hiilhing criminal didto sa ilawom sa tulay sa Mananga, habig sa barangay Lawaan III dakbayan sa Talisay kagahapon sa buntag.

Ang biktima mao si Johnlyn Enopia, 21, nga taga sitio Mahayag, dakbayan sa Mandaue kinsa samdan sa walang bahin sa iyang buko-buko sa usa ka bala sa armas de fuego nga milapos usab sa iyang dughan.

Si SPO1 Mikie Espina ug PO2 Stephen Sefuesca kinsa maoy miresponde sa   maong insidente mibutyag sa Banat News nga ang biktima kansang lawas nabulit sa patik, nagdumili sa pagtubag sa ilang mga pangutana hinungdan nga natahap sila niining adunay gitagoan ngadto kanila.

Matud pa ni Espina ug Sefuesca   nga sa mga alas 9:00 kagahapon sa buntag si Enopia may kaubang unom ka wala hiilhing lalaki didto sa ilawom sa tulay sa Mananga.

Unya taud-taod miulbo ang panaglalis sa maong grupo apan usa sa mga kauban sa maong pundok milanit sa iyang armas de fuego ug dayon mipusil kang Enopia.

Human mahagba sa yuta ang biktima nagbuwag-buwag   og panagan   ug gibiyaan ang biktima nga naglunang sa iyang dugo. Padayon pang mihimo og follow-up ang kapolisan sa maong hitabo. (BANAT NEWS)