CEBU, Philippines - Gipahibalo kagahapon sa hepe sa Department of Veterinary Medicine and Fisheries (DVMF) nga si Dr. Alice Utlang nga dunay 40 ka mga piniling kapitan ang palargahon sa Las Vegas sa Estado Unidos sunod tuig nga gastuhan sa Humane Society International (HSI).
Sumala pa ni Utlang nga dako kaayo og natampo ang maong international group dinhi sa Pilipinas alang sa pag-edukar sa publiko kabahin sa pagmahal sa mga hayop.
Ang maong grupo mihatag na og mga libreng training sa nagkadaiyang veterinarian gikan sa nagkalain-laing local government units sa nasud aron matudloan sila sa bag-ong mga teknik ug pamaagi sa pag-atiman sa mga mananap.
Ang mga kapitan nga dad-on sa Las Vegas matagaan og higayon sa pag-obserbar sa saktong pagkontrolar sa populasyon sa mga mananap sa makatawhanong pamaagi ug motambong usab sila sa animal welfare expo sa maong dapit.
Ang dakbayan taud-taud na nga mituman sa saktong pamaagi sa paghipos sa iro pinaagi sa pagamit og net human makaani og mga pagsaway gikan sa publiko ug animal lovers societies tungod sa dili maayong pamaagi sa pagsikop sa mga libud-suroy nga mga hayop sa siyudad gamit ang alambre ug ang pagpatay kanila pinaagi sa paglumos sa aso.
Sumala pang Utlang ang direktor sa HIS nga si Kelly Omeara gikatakdang mobisita karong Nobiyembre 29 aron mo-obserbar usab sa mga proyekto dinhi sa siyudad.
I-anunsiyo usab sa direktor sa HIS ang dugang napud nga proyekto nga idalit niini dinhi sa Sugbo ug pakigkitaan niini si Mayor Michael Rama.
Samtang sugdan usab karon ang pagbansay-bansay sa 12 ka mga veterinarian gikan sa nagkailain-laing local government units diha sa Southwestern University nga tapuson sa Disyembre 5. (BANAT NEWS)