CEBU, Philippines - Lima ka tawo ang naangol sa duha ka managlahing aksidente sa kadalanan sa dakbayan sa Mandaue ug sa Bogo niadtong milabay’ng Biyernes.
Diha sa Mandaue, duha ka babaye ang nangaangol sa dalan M.C. Briones sa barangay Basak nga sila si Norma Uy, 49, taga barangay Tayud sa lungsod sa Consolacion ug Rowena Soriano, 43, taga barangay Cubacub sa nahisgutang dakbayan napunggit sa motorsiklo.
Si PO2 Ruben Serdania, imbestiagdor sa traffic division sa Mandaue City Police Office (MCPO) nga nahinabi sa Banat News miingon nga milabang sa pikas habig sa karsada ang duha apan mihunong sa taliwala tungod sa pag-agi sa mga sakyanan sa pikas habig sa maong dalan.
Apan nianang tungura kalit mi-overtake ang motorsiklo nga gimaneho ni Efren Lebosearda, 25, taga Upper Tabok sa dakbayan sa Mandaue sa nag-unang sakyanan sa iyang atubangan ug napunggit hinuon ang duha ug nakaangol usab kang Lebosearda. Ang tulo gidala sa Mandaue City Hospital.
Samtang talandugon sad ang kahimtang sa usa ka Jomar Alburo, 24, taga Bungtod, Bogo City ingon man pasahero niining si Joebert Perez Raymundo dihang gikabanggaanay ang kasugat nga sakyanan sa iyang gimanehong traysikol.
Ang aksidente nahitabo diha sa barangay Binabag sa maong siyudad niadtong Biyernes sa alas 7:00 sa gabii.
Ang drayber sa gikadinasmagay niini nga sakyanan mao si Wetsel Hodilla,32,taga Maguikay siyudad sa Mandaue.
Matud ni PO3 George Osena sa Bogo City Police Station dihang nahinabi sa Banat News, paingon sa Bogo Proper ang traysikol ug kasugat niini ang sakyanan ni Hodilla gikan sa Sugbo.
Gikatahong milihay unta ang traysikol sa libaong apan nasampak hinuon kini sa gikasugat nga sakyanan ug naguroy sulod sa 14 ka metros hinungdan sa pagkaangol sa mga sakay sa traysikol.
Ang drayber sa sakyanan kasamtangang gi-hold sa buhatan sa kapulisan alang sa dugang imbestigasyon sa hitabo. (BANATNEWS)