Namaligya'g x-rated DVDs gibaharan

CEBU, Philippines -  Gipahimangnoan sa tsirman sa Cebu City Anti-Indecency Board (CCAIB) nga si Dr. Lucille Mercado ang mga DVD vendors nga dili gyud mamaligya og mga x-rated o malaw-ay nga mga palabas.

Gipahibalo ni Mercado nga sukwahi kaniadto ang masakpang namaligya ug madakpan nga ilahang napasakaan og kaso sayon rang makapiyansa tungod kay P5,000 ra ug temporaryong makagawas sa bilanggoan.

“Sa una man gud , magsalig ra nang mga tawhana kay P5,000 ra ang piyansa, pero karon moabot naman siya og P26,000 (piyansa),” nagkanayon si Mercado. Kini tungod sa pag-amendar sa maong Dugang pa ni Mercado nga duna nay usa ka tawo taga Barangay Talamban ang napasakaan og kaso sa miaging buwan ug nakabayad gyud kini og P26,000 isip piyansa.

Human makapiyansa pending gihapon ang kaso niini diha sa korte ug may posibilidad sila nga mabilanggo gihapon kun mapamatud-ang sad-an.

Matud pa ni Mercado nga gumikan sa kadako sa piyansa, mahadlok na ang mga DVD vendors nga mamaligya og pornographic materials ug karon padayon pa ang ilang pagpaniid sa mga dapit diin adunay mga baligya niini.

Saysay pa ni Mercado nga naandan na kaniadto nga ang mga tindera magdumili sa pagtug-an sa pangalan sa ilang amo apan karon mapugos na kini sa pagtug-an gumikan kay sila na maoy ikiha.

Ang Cebu City adunay kaugalingong ordinansa City Ordinance 1408 Anti-Indecency Ordinance samtang ang Revised Penal Code of the Philippines aduna say kapares nga susamang balaod bahin sa pornograpiya. (BANATNEWS)