CEBU, Philippines - Lapad nga parada mahitungod sa kampanya batok sa gidiling drugas ang pasiugdahan sa Cebu City Office for Substance Prevention (COSAP) dinhi sa dakbayan sa Sugbo karong Domingo sa hapon.
Ang COSAP pinangulohan ni Joey Herrera mitakda sa parada alas 4:30 sa hapon karong Domingo nga anha mag-assemble sa Cebu City Hall Ground ug ang parada adto kutob sa Fuente Osmeña Oval.
Si kanhi Dangerous Drugs Board (DDB) Undersecretary Paul Clarence Oaminal mibutyag sa Banat News nga ang maong kalihukan maoy culminating activity sa pagsaulog sa Drug Abuse Prevention and Control Week nga gisaulog gikan sa petsa 13 ning bulana hangtud petsa 20 sa Domingo.
Nunot niini, nanawagan si Oaminal sa mga Sugboanon pagsalmot sa parada nga gitumong pagkab-ot sa damgo nga mahimong drug free ang Sugbo.
Dugang ni Oaminal nga pagpakita usab kini ilabi na sa mga drug syndicates nga kinabag-an sa mga Sugboanon ang dakung supak sa gidiling drugas.
Ang maong selebrasyon karung tuiga nagdala kini sa tema nga “Mahalon ang kinaiyahan, panglawas ampingan, druga likayan.”
Dugang ni Oaminal maglisud sa kampanya ang kapulisan pagpuhag niini kun way kooperasyon ang publiko.(EIM) (BANATNEWS)