CEBU, Philippines - Usa ka kawani sa city hall sa dakbayan sa Talisay mibutyag sa Banat News kagahapon nga si Mae Auza, iyang asawa ug dili uyab sa usa ka diplomat nga nadakpan sa mga tanod sa maong dakbayan niadtong Domingo sa kaadlawon.
Ang maong pagpatin-aw gihimo ni Erick (wa motug-an sa iyang apelyido) human niya mabasa ning Banat News ang ngalan sa iyang asawa nga nasaypan sa kapolisan sa maong dakbayan nga uyab sa usa ka langyaw nga diplomat kinsa wala usab magpaila sa iyang pagkalungsoranon kon nationality.
Matud pa ni Erick nga ang asawa sa diplomat mao si Cora Alnagbi nga igsoon ni Mae. Nasayran gikan sa kapolisan sa Talisay nga ang langyaw nga ila lang usab dayong gibuhian human i-endosar sa mga tanod kanila, kay lagi usa ka diplomat, nasaypan nilang si Mae Auza uyab sa maong langyaw.
Ang maong langyaw didto sikopa sa mga tanod sa Carmen Village sa barangay Poblacion, gumikan sa reklamo sa asawa niini kay gawas nga hubog nanghagis pa kaniya. (BANATNEWS)