Ulitawo gidunggab angol sa driver

CEBU, Philippines - Samdan ang usa ka ulitawo human dunggaba sa wala hiilhing drayber sa traysikol didto sa sitio Sangi Crossing sa barangay Pajo, dakbayan sa Lapulapu , sa miaging gabii.

Ang biktima mao si Jomar Pelenio, 25 , ulitawo nga lumad nga taga Lanao del Norte ug temporaryong nagpuyo sa barangay Kalawisan sa maong dakbayan.

Si SPO1 Manolito Abellanosa sa homicide section sa kapolisan sa maong dakbayan nga nahinabi sa Banat News miingon nga giangkas sa biktima sa iyang motorsiklo ang iyang kapuyo nga ihatod unta niya sa gitrabahoan niini.

Sa ilang pag-abot sa nahisgotang dapit maoy nasinati ang hilabihan ka huot sa mga sakyanan ,   busa gisinggitan sa biktima ang drayber sa motorsiklo nga nababag sa taliwala sa dalan nga maoy nakaingon sa pagkabara sa mga sakyanan, apan napungot ang naulahi.

Matud pa ni SPO1 Abellanosa nga mikanaug ang kriminal sa iyang traysikol ug giduol ang biktima ug dayon gidunggab ang tuong dughan niini dayong sibat pahilayo sa maong dapit.

Si SPO1 Abellanosa miingon nga unang gidala ang biktima sa Lapulapu City District Hospital apan human sa pasiunang pagtambal dali kining gibalhin ngadto sa Vicente Sotto Memorial Medical Center sa dakbayan sa Sugbo.

Padayon pang gipangita sa kapolisan ang kriminal. (BANATNEWS)