CEBU, Philippines - Nakigtagbo kang Governor Gwen Garcia si Mayor Edsel Galeos sa lungsod sa Argao sa pagpangayo og suporta sa gobernador sa ilang tinguha nga ikabalhin ang ilang tambalahan ngadto sa ilang puwesto tungod kay ang nahimutangan niini karon usa ka heritage zone, kun sona nga karaan.
Si Mayor Galeos miingon nga ang nahimutangan karon sa ilang district hospital duol kaayo sa kampanaryo sa simbahan ug ang bagting sa kampana makadisturbo kaayo sa mga pasyente.
Gawas niini si Mayor Galeos miingon nga sanapan usab sa tubig baha ang ilang hospital sa higayon nga mobunok ang kusog nga ulan tungod sa nagpadayong problema sa drainage system sa lungsod sa Argao.
Ang mayor sa Argao miingon nga misugot na ang gobernador sa ilang hangyo apan kun kapatukod sila og bag-ong hospital, gusto sa gobernador nga dili gub-on ang kasamtangang hospital.
Kini aron mahimong kabahin sa heritage site sa lungsod ug usa sa mahimong tourist attraction sa maong dapit.
Wala pa ibutyag ni Galeos ang lugar nga tukoran og bag-ong edipisyo sa hospital , apan nasiguro niya nga basta malayo lang kini sa kampanaryo siguradong dili na madisturbo sa bagting sa kampana ang mga pasyente nga mapaslak niini. (BANATNEWS)