CEBU, Philippines - Talandugon ang kahimtang sa manag-uyab dihang human kini dasmagi sa motorsiklo, nadasmagan pa gyud sa taxi dihang mitabok kini sa dalan A.S. Fortuna Avenue dakbayan sa Mandaue sa milabay’ng gabii.
Ang mga biktima mao sila si Noreen Ann Basubas ug John Tul-id, pulos hingkod, ug residente sa Brgy. Cabancalan dakbayan sa Mandaue.
Base sa pasiunang imbestigasyon sa kapolisan nga samtang milabang ang mga biktima sa karsada, wala sila makabantay sa nagbaguros nga motorsiklo nga midasmag kanila.
Gumikan sa kakusog sa maong pagkadasmag, nangalagpot sa pikas daplin sa karsada ang mga biktima apan gidagit usab sila sa nagbaguros nga taxi sa maong higayon.
Dali silang gisakwat sa mga nakasaksi ug gihatod ngadto sa Mandaue City Hospital apan pipila ka gutlo gibalhin kini ngadto sa Cebu Community Hospital sa dakbayan sa Sugbu.
Ang driver sa taxi nga si Henry Panunsi mitahan dayon ngadto sa buhatan sa traffic division sa MCPO.
Samtang sa pagsuwat ning balita ang driver sa motorsiklo nalandig usab sa tambalanan gumikan sa bun-og sa iyang kalawasan gumikan sa maong disgrasya. Gisubay usab sa kapolisan kung kinsay manubag ug mapasakaan og kaso kalabot sa maong insedente, ang nagmaneho ba sa motorsiklo o ang nagmaneho sa taxi. (/WC) (BANATNEWS)