Mangulingay gipusil angol

CEBU, Philippines - Kritikal ang kahimtang sa usa ka mangulingay human kini pusila sa wala hiilhing kriminal didto sa bukirang barangay sa Cabadiangan lungsod sa Alcantara sa milabay’ng gabii.

Ang biktima nga nabulit sa mga samad pinusilan sa kalawasan mao si Cresencio Saltaren, 39, minyo, molupyo sa maong lugar ug usa ka mangulingay ang panginabuhi.

Si SPO2 Meliton Agadier sa Alcantara Police Station mibutyag sa Banat News nga ang biktima gikang mitan-aw sa salida sa telebisyon sa silingan niini ug pagkahuman mipauli nga nag-inusara.

Apan wala una kini molahos sa ilang balay kay mihapit sa iyang ulingan sa pagsusi kun wala pa ba mauling ang iyang gidaubang mga ulingon, dihang kalit lang siyang gipusil sa makadaghang higayon sa kriminal nga wala niya hiilhi.

Ang asawa sa biktima mitug-an sa kapolisan nga nakit-an pa niya ang biktima nga nakadagan pa bisan samaron paingon sa ilang balay ug gigukod pa gyud kini sa kriminal nga gisigihan og pusil.

Dihang nakasulod na sa balay ang biktima mihunong na ang kriminal sa pagpabuto sa iyang armas de fuego.

Gihatud dayon ang biktima   sa Vicente Sotto Memorial Medical Center (VSMMC) ug pabiling gi-atiman sa mga doktor tungod kay anaa kini sa seryuso nga kahimtang.

Samtang padayon pang gipangita sa kapolisan ang kriminal.

Gituohan sa kapolisan nga adunay nasuko sa biktima sanglit kun mahubog magpakita og dili maayong batasan. (BANATNEWS)