CEBU, Philippines - Manag-inahan gisaka sa ilang balay sa mga tulisan ug gipamusil diha sa barangay Looc sa lungsod sa Oslob niadtong Huwebes sa gabii atol nga nag-blackout ang kuryente sa tibuok lungsod.
Nangaangol sa maong pagpamusil ang manag-inahang sila si Ma. Conception Agda, 58, ug anak niining si Ma. Theresita Agda, 28.
Hinuon usa sa duha ka mga suspek ang nadakpan dayon sa hot pursuit operation ug giilang si Ronen Senajon Gumilao, 21, molupyo sa nahisgutang lugar.
Gipangita pa karon sa kapolisan ang ikaduhang suspek nga si Earl Rustler Sigura alyas Diokno, kinsa aduna nay warrant of arrest sa kasong frustrated murder.
Matud ni PO3 Nelson Saquibal sa Oslob Police Station dihang nahinabi sa Banat News nangatulog na ang mga biktima unta niadtong higayuna tungod kay black out sa tibuok lungsod.
Gikatahong kalit misaka ang duha ka suspek nga pulos armado og wala matinong kalibre sa armas ug mideklarar dayon og tulis.
Apan ang kapuyo ni Theresita nga si Gerome nakabantay ug mipunit dayon sa telepono aron pagtawag sa mga polis apan usa sa mga tulisan ang nakakita ug mipusil kaniya apan swerteng wala kini maigo ug nakadagan.
Si Ma. Conception misuway usab unta og dagan sa gawas apan mao na usab kini ang gipusil duha ka higayun ug naigo sa bukobuko.
Tungod sa karatol sa pagpunay og siyagit sa anak ni Conception nga si Ma. Theresita og “hala naa nay polis!” nasuko ang laing suspek ug mao na usab kini ang gipusil sa kilid nga bahin sa lawas una pa nanagan gawas sa balay ang mga tulisan.
Ang mga biktima gidala sa Oslob District Hospital ug nakatug-an sa mga polis si kinsa ang mga tulisan. Matud pa nga nakaila sila kanila sanglit anha kini magpalitan sa ilang tindahan og load sa cellphone.
Armado sa maong impormasyon giadto sa kapolisan ang panimalay sa mga suspek ug nadakpan si Gumilao alas 11:10 na sa gabii samtang si Sigura padayun pang natagotago.(/EIM) (BANATNEWS)